ಮಂಗಳೂರು: ಹಿರಿಯ ನಾಗರಿಕರೊಬ್ಬರಿಗೆ ಅಪರಿಚಿತರು ಲಿಂಕ್ ಕಳುಹಿಸಿ ಎಪಿಕೆ ಫೈಲ್ ಡೌನ್ ಲೋಡ್ ಮಾಡಲು ಹೇಳಿ 3.83 ಲಕ್ಷ ರೂ. ವಂಚಿಸಿರುವ ಬಗ್ಗೆ ಮಂಗಳೂರು ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ದೂರುದಾರರು 74 ವರ್ಷದವರಾಗಿದ್ದು, ಮೊಟರೋಲಾ ಕಂಪೆನಿಯ ವಾಷಿಂಗ್ ಮೆಷಿನ್ ಖರೀದಿಸುವ ಉದ್ದೇಶದಿಂದ ಅ. 25ರಂದು ಬೆಳಗ್ಗೆ 10 ಗಂಟೆಗೆ ಮೋಟರೋಲಾ ವಾಷಿಂಗ್ ಮೆಷಿನ್ ಸೆಂಟರ್ ಮಂಗಳೂರು ಎಂದು ಗೂಗಲ್‌ನಲ್ಲಿ ಸರ್ಚ್ ಮಾಡಿದ್ದರು. ಆಗ ಮೊಬೈಲ್ ನಂಬರ್ ಒಂದು ಸಿಕ್ಕಿದ್ದು, ಅದಕ್ಕೆ ಕರೆ ಮಾಡಿದಾಗ ಅದರಿಂದ ಅವರ ಮೊಬೈಲ್‌ಗೆ ಒಂದು ಲಿಂಕ್ ಕಳುಹಿಸಿ ಎಪಿಕೆ ಫೈಲ್ ಡೌನ್ಲೋಡ್ ಮಾಡಲು ತಿಳಿಸಿದರು.
ಫೈಲ್ ಡೌನ್ಲೋಡ್ ಮಾಡಿದ ಕೂಡಲೇ ದೂರುದಾರರ ಒಂದು ಬ್ಯಾಂಕ್‌ ಖಾತೆಯಿಂದ 2,35,000 ರೂ. ಮತ್ತು ಇನ್ನೊಂದು ಖಾತೆಯಿಂದ 1,48,000 ರೂ. ಹಣ ಹಂತ ಹಂತವಾಗಿ ಕಡಿತವಾಗಿರುವ ಬಗ್ಗೆ ಸಂದೇಶ ಬಂದಿತು. ಎಪಿಕೆ ಲಿಂಕ್ ಮೂಲಕ ವೈಯಕ್ತಿಕ ಮಾಹಿತಿಯನ್ನು ಕದ್ದು 3,83,000 ರೂ. ವಂಚನೆ ಮಾಡಿರುವ ಅಪರಿಚಿತರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಹಿರಿಯ ನಾಗರಿಕರು ದೂರಿನಲ್ಲಿ ಆಗ್ರಹಿಸಿದ್ದಾರೆ.
Discover more from Coastal Times Kannada
Subscribe to get the latest posts sent to your email.
Discussion about this post