ನವ ಮಂಗಳೂರು ಬಂದರಿಗೆ ಐಷಾರಾಮಿ ಹಡಗು ‘MS SILVER WHISPER’ ಆಗಮನ

ಮಂಗಳೂರು: ಈ ಋತುವಿನ ಮೊದಲ ವಿಹಾರ ನೌಕೆ MS SILVER WHISPER (ಎಂಎಸ್ ಸಿಲ್ವರ್ ವಿಸ್ಪರ್) ನವ ಮಂಗಳೂರು ಬಂದರಿಗೆ ಮಂಗಳವಾರ ಆಗಮಿಸಿತು. ಐಷಾರಾಮಿ ಹಡಗು ಮುಂಬೈನಿಂದ ಆಗಮಿಸಿದ್ದು, 299 ಪ್ರಯಾಣಿಕರು ಮತ್ತು 296 ಸಿಬ್ಬಂದಿ ಇದ್ದರು. ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ಮುಲ್ಲೆ ಮುಗಿಲನ್​ ಅವರು ಹಡಗಿನ ಕ್ಯಾಪ್ಟನ್‌ಗೆ ಸ್ಮರಣಿಕೆ ನೀಡುವ ಮೂಲಕ ಅತಿಥಿಗಳನ್ನು ಸ್ವಾಗತಿಸಿದರು.

ಪ್ರಯಾಣಿಕರು ಮೂಡುಬಿದಿರೆಯ ಸಾವಿರಗಂಬದ ಬಸದಿ, ಕದ್ರಿ ಮಂಜುನಾಥ ದೇವಸ್ಥಾನ, ಸೇಂಟ್ ಅಲೋಶಿಯಸ್ ಚಾಪೆಲ್ ಮತ್ತು ಪಿಲಿಕುಳದ ನಿಸರ್ಗಧಾಮಕ್ಕೆ ಭೇಟಿ ನೀಡಿದರು. ಈ ಹಡಗು 186 ಮೀಟರ್ ಉದ್ದ, 6.20 ಮೀಟರ್ ಡ್ರಾಫ್ಟ್ ಮತ್ತು 28,258 ಟನ್‌ ತೂಕ ಹೊಂದಿದೆ. ಅಂತಾರಾಷ್ಟ್ರೀಯ ಪ್ರವಾಸದಲ್ಲಿರುವ ಹಡಗು ಕೇಪ್​ಟೌನ್, ಮುಂಬೈ, ಮಂಗಳೂರು, ಕೊಲಂಬೊ ಮತ್ತು ಇತರೆ ಸ್ಥಳಗಳಿಗೆ ಪ್ರಯಾಣಿಸುತ್ತದೆ.

ಹಡಗಿನಲ್ಲಿ ಹೈಟೆಕ್ ಸೌಲಭ್ಯ: ಪ್ರಯಾಣಿಕರ ಅನುಕೂಲತೆಗಾಗಿ 14 ಇಮಿಗ್ರೇಷನ್ ಕೌಂಟರ್‌ಗಳು, 2 ಕಸ್ಟಮ್ಸ್ ಕೌಂಟರ್‌ಗಳು, ವೈದ್ಯಕೀಯ ತಪಾಸಣಾ ಕೇಂದ್ರಗಳು, ಆಯುಷ್ ಸಚಿವಾಲಯದ ಧ್ಯಾನ ಕೇಂದ್ರ ಮತ್ತು ಯಕ್ಷಗಾನದ ಚಿತ್ರಣ ಹೊಂದಿರುವ ಸೆಲ್ಫಿ ಸ್ಟ್ಯಾಂಡ್ ಸೇರಿದಂತೆ ಹಲವು ಅತ್ಯಾಧುನಿಕ ಸೌಲಭ್ಯಗಳನ್ನು ಹಡಗಿನಲ್ಲಿ ಕಾಣಬಹುದು. ಈ ಪ್ರಥಮ ಕ್ರೂಸ್ ಹಡಗು, ನವ ಮಂಗಳೂರು ಬಂದರನ್ನು ಭಾರತದ ಪ್ರಮುಖ ಕ್ರೂಸ್ ತಾಣವಾಗಿ ಗುರುತಿಸಿದೆ.