ಇನ್ನು ಟ್ವಿಟರ್​ ಬ್ಲೂ ಟಿಕ್ ಫ್ರೀ ಇಲ್ಲ.. ಪ್ರತಿ ತಿಂಗಳು 20 ಡಾಲರ್ ನೀಡಬೇಕು..! ಟೆಸ್ಲಾ ಸಿಇಒ ಎಲಾನ್ ಮಸ್ಕ್

ವಾಷಿಂಗ್ಟನ್​: ಟ್ವಿಟರ್​ನ ಬ್ಲೂ ಸಬ್​ಸ್ಕ್ರಿಪ್ಷನ್ ಪಡೆಯಬೇಕಾದರೆ ಇನ್ನು ಮುಂದೆ ಹಣ ಪಾವತಿಸಬೇಕಾಗುತ್ತದೆ ಎಂದು ಮೂಲಗಳು ತಿಳಿಸಿವೆ. ವಿಶ್ವದ ಸಿರಿವಂತ ಉದ್ಯಮಿ ಎಲಾನ್ ಮಸ್ಕ್ ಟ್ವಿಟರ್​​ ಅನ್ನು ಸ್ವಾಧೀನಪಡಿಸಿಕೊಂಡು ಅದರ ಸಿಇಒ ಆದ ನಂತರ ಈ ಹೊಸ ಬದಲಾವಣೆ ಜಾರಿಗೆ ಬರಲಿದೆ.

ಹೊಸ ಟ್ವಿಟರ್ ಬ್ಲೂ ಟಿಕ್ ಸಬ್​ಸ್ಕ್ರಿಪ್ಷನ್​ಗಾಗಿ ಪಡೆಯಬೇಕಾದರೆ  ಪ್ರತಿ ತಿಂಗಳು 19.99 ಯುಎಸ್​ ಡಾಲರ್ ಅಥವಾ ಸುಮಾರು 1600 ರೂಪಾಯಿ ಶುಲ್ಕ ವಿಧಿಸಲು ಯೋಜಿಸುತ್ತಿದೆ. ಬ್ಲೂ ಸಬ್​ಸ್ಕ್ರಿಪ್ಷನ್ ಇದು ಟ್ವೀಟ್‌ಗಳನ್ನು ಎಡಿಟ್ ಮಾಡುವುದು ಮತ್ತು ಅನ್​ಡು ಮಾಡುವಂಥ ಹೆಚ್ಚುವರಿ ವೈಶಿಷ್ಟ್ಯಗಳನ್ನು ನೀಡುತ್ತದೆ.  ಆದರೆ ಇದಿನ್ನೂ ಅಂತಿಮಗೊಂಡಿಲ್ಲ. ಹೀಗಾಗಿ ಇದನ್ನು ಕೈ ಬಿಡುವ ಸಾಧ್ಯತೆಯನ್ನೂ ಅಲ್ಲಗಳೆಯುವಂತಿಲ್ಲ ಎಂದೂ ತಿಳಿದು ಬಂದಿದೆ.

ಪ್ರಸ್ತುತ ಯೋಜನೆಯಡಿ ವೆರಿಫೈಡ್ ಯೂಸರ್ಸ್ 90 ದಿನಗಳ ಒಳಗೆ ಸಬ್​ಸ್ಕ್ಷಿಪ್ಷನ್ ಪಡೆದರೆ ಬ್ಲೂ ಟಿಕ್ ಉಳಿಸಿಕೊಳ್ಳುತ್ತಾರೆ. ಇಲ್ಲವಾದರೆ ಅವರು ಬ್ಲೂ ಟಿಕ್ ಸಬ್​ಸ್ಕ್ರಿಪ್ಷನ್ ಕಳೆದುಕೊಳ್ಳುತ್ತಾರೆ. ನವೆಂಬರ್ 7ರ ಒಳಗೆ ಈ ಫೀಚರ್​ ಅನ್ನು ಜಾರಿಗೊಳಿಸುವಂತೆ ಈ ಯೋಜನೆಯ ಮೇಲೆ ಕೆಲಸ ಮಾಡುತ್ತಿರುವ ಉದ್ಯೋಗಿಗಳಿಗೆ ತಿಳಿಸಲಾಗಿದೆ. ಇಲ್ಲವಾದರೆ ಅವರನ್ನು ನೌಕರಿಯಿಂದ ಕಿತ್ತೆಸೆಯಲಾಗುವುದು ಎಂದು ಎಚ್ಚರಿಕೆ ನೀಡಲಾಗಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.

ಯೂಸರ್ ವೆರಿಫಿಕೇಶನ್ ಪ್ರಕ್ರಿಯೆಯನ್ನು ಮರುಪರಿಶೀಲಿಸಲಾಗುವುದು ಎಂದು ಎಲಾನ್ ಮಸ್ಕ್ ತಮ್ಮ ಟ್ವೀಟ್​ನಲ್ಲಿ ಹೇಳಿದ ಒಂದು ದಿನದ ನಂತರ ಟ್ವಿಟರ್ ಬ್ಲೂ ಟಿಕ್ ಸಬ್​ಸ್ಕ್ರಿಪ್ಷನ್ ನಿಯಮ ಬದಲಾವಣೆಯ ಬಗ್ಗೆ ವರದಿಗಳು ಬಂದಿವೆ. ಒಂದು ವರ್ಷದ ಹಿಂದೆ ಟ್ವಿಟರ್ ಬ್ಲೂ ಸಬ್​ಸ್ಕ್ರಿಪ್ಷನ್ ಆರಂಭಿಸಲಾಗಿತ್ತು. ಜಾಹೀರಾತು ಇಲ್ಲದೇ ಕೆಲ ಪ್ರಕಾಶಕರ ಲೇಖನಗಳನ್ನು ಓದಲು ಮತ್ತು ಹೋಮ್ ಸ್ಕ್ರೀನ್ ಬಣ್ಣ ಬದಲಾಯಿಸುವುದು ಮುಂತಾದ ಫೀಚರ್​ಗಳು ಇದರಲ್ಲಿವೆ.