ಎಲಾನ್ ಮಸ್ಕ್​ ಒಡೆತನದ ಸ್ಟಾರ್​ಲಿಂಕ್​ ಜೊತೆ ಏರ್​ಟೆಲ್​ ಒಪ್ಪಂದ : ಭಾರತದಲ್ಲಿ ಇಂಟರ್​ನೆಟ್​ ಸೇವೆಗೆ ಸಿಗಲಿದೆ ಮತ್ತಷ್ಟು ವೇಗ

ನವದೆಹಲಿ: ಅಮೆರಿಕದ ಇಂಟರ್​ನೆಟ್​ ದೈತ್ಯ ಸ್ಟಾರ್​ಲಿಂಕ್​ ಶೀಘ್ರದಲ್ಲೇ ಭಾರತದ ಗ್ರಾಹಕರಿಗೂ ಸೇವೆ ನೀಡುವ ಕಾಲ ಸಮೀಪಿಸುತ್ತಿದೆ. ಇಂಟರ್​ನೆಟ್‌ಗೆ ವೇಗ ನೀಡುವ ಸಂಬಂಧ ಭಾರತದ ಟೆಲಿಕಾಂ ಕಂಪನಿ ಭಾರ್ತಿ ಏರ್​ಟೆಲ್​ ಎಲಾನ್​ ಮಸ್ಕ್​ ಅವರ ಸ್ಟಾರ್​ಲಿಂಕ್​ ಜೊತೆಗೆ ಮಂಗಳವಾರ ಒಪ್ಪಂದಕ್ಕೆ ಸಹಿ ಹಾಕಿದ್ದು, ಸರ್ಕಾರದ ಅನುಮತಿಯೊಂದೇ ಬಾಕಿ ಇದೆ.

​ಭಾರತದ ಎರಡನೇ ಅತಿ ದೊಡ್ಡ ಟೆಲಿಕಾಂ ಕಂಪನಿ ಏರ್​ಟೆಲ್​, “ಈ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್​ ಮಾಡಿದ್ದು, ಭಾರತಕ್ಕೆ ಸ್ಟಾರ್‌ಲಿಂಕ್ ತರಲು ಸ್ಪೇಸ್‌ಎಕ್ಸ್‌ನೊಂದಿಗಿನ ಸಹಯೋಗ ನಮ್ಮ ಬದ್ಧತೆಯನ್ನು ಬಲಪಡಿಸುತ್ತದೆ. ಇದು ಎಲ್ಲರಿಗೂ ತಡೆರಹಿತ ಬ್ರಾಡ್‌ಬ್ಯಾಂಡ್ ಸಂಪರ್ಕ ನೀಡುವಲ್ಲಿ ಒಂದು ಪರಿವರ್ತಕ ಹೆಜ್ಜೆ. ಆದರೆ, ಸ್ಟಾರ್​ಲಿಂಕ್​ ಭಾರತದಲ್ಲಿ ಕಾರ್ಯನಿರ್ವಹಿಸುವ ನಿರ್ಧಾರ ಸರ್ಕಾರದ ಅನುಮೋದನೆಯ ಮೇಲೆ ಅವಲಂಬಿತವಾಗಿದೆ” ಎಂದಿದೆ.

“ಭಾರತದ 140 ಕೋಟಿ ಜನರಲ್ಲಿ ಕನಿಷ್ಠ ಶೇ.40ರಷ್ಟು ಜನರು ಇನ್ನೂ ಕೂಡ ಇಂಟರ್​ನೆಟ್​ ಸೌಲಭ್ಯ ಪಡೆದಿಲ್ಲ. ಸ್ಯಾಟಲೈಟ್​ ಬ್ರಾಂಡ್​ಬಾಂಡ್​ಗಳು ಈ ಅಂತರವನ್ನು ನೀಗಿಸಬೇಕಿದೆ. ವಿಶೇಷವಾಗಿ, ಭಾರತದ ಕುಗ್ರಾಮಗಳು ಮತ್ತು ಬೆಟ್ಟಗಾಡು ಪ್ರದೇಶದಲ್ಲಿ ಅವರಿಗೆ ಸೌಲಭ್ಯ ಬೇಕಿದೆ. ಮಸ್ಕ್​ ಅವರ ಸ್ಟಾರ್‌ ಲಿಂಕ್​ ಭೂಮಿಯ ಸುತ್ತ ಕನಿಷ್ಠ 6,900 ಸಕ್ರಿಯ ಸ್ಯಾಟಲೈಟ್‌ಗಳನ್ನು​ ಹೊಂದಿದ್ದು, ಈ ಹಿಂದೆ ಇಂಟರ್​ನೆಟ್​ ಸಿಗುವುದಿಲ್ಲ ಎನ್ನುತ್ತಿದ್ದ ಸ್ಥಳಗಳೂ ಸೇರಿದಂತೆ ಎಲ್ಲೆಡೆ ಕಡಿಮೆ ಸುಪ್ತ ಬ್ರಾಂಡ್​ಬ್ಯಾಂಡ್​ ಹೊಂದಿದೆ” ಎಂದು ಮಾಹಿತಿ ನೀಡಿದೆ.

ಜಗತ್ತಿನ ಅತಿದೊಡ್ಡ ಮಾರುಕಟ್ಟೆಗೆ ಸ್ಟಾರ್​ಲಿಂಕ್​ ಪ್ರವೇಶಕ್ಕಾಗಿ ಮಸ್ಕ್​​ ಕೂಡಾ ಬಹುದಿನಗಳಿಂದ ಕಾಯುತ್ತಿದ್ದಾರೆ. ಆದರೆ ದೇಶದ ನಿಯಂತ್ರಕ ನಿಯಮಗಳ ಸವಾಲುಗಳು, ದೇಶಿಯ ಟೆಲಿಕಾಂ ದೈತ್ಯ ಕಂಪನಿಗಳ ವಿರೋಧ ಹಾಗೂ ಭದ್ರತಾ ವಿಚಾರಗಳು ತೊಡಕಾಗಿದ್ದವು. ಭಾರತ ಪ್ರವೇಶಕ್ಕೆ ಸ್ಟಾರ್​ಲಿಂಕ್​ ಇನ್ನೂ ಭದ್ರತಾ ನಿಯಮಗಳನ್ನು ಪೂರ್ಣಗೊಳಿಸಿಲ್ಲ. ಇದು ಪೂರ್ಣಗೊಂಡ ನಂತರವೇ ಸ್ಯಾಟಲೈಟ್​ ಸಂಪರ್ಕ ಸೇವೆಗೆ ಲೈಸೆನ್ಸ್​ ನೀಡಲಾಗುವುದು. ಇದಕ್ಕೆ ಸಂಸ್ಥೆ ಅಗತ್ಯ ಕಾನೂನು ಕ್ರಮಗಳನ್ನು ಮುಗಿಸಬೇಕು ಎಂದು ಕಳೆದ ನವೆಂಬರ್​ನಲ್ಲಿ ಭಾರತದ ಟೆಲಿಕಾಂ ಸಚಿವ ಜ್ಯೋತಿರಾಧಿತ್ಯ ಸ್ಕಿಂದಿಯಾ ಹೇಳಿದ್ದರು.

ಇತ್ತೀಚೆಗೆ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅಮೆರಿಕಕ್ಕೆ ಪ್ರವಾಸ ಕೈಗೊಂಡ ವೇಳೆ ಮಸ್ಕ್​ ಅವರನ್ನು ಭೇಟಿಯಾಗಿ ಸ್ಪೇಸ್​ ಎಕ್ಸ್​, ಟೆಸ್ಲಾ ಭಾರತ ಪ್ರವೇಶ ಹಾಗು ಹಲವು ವಿಚಾರಗಳ ಕುರಿತು ಮಾತುಕತೆ ನಡೆಸಿದ್ದರು. ಈ ಬೆನ್ನಲ್ಲೇ ಈ ಒಪ್ಪಂದವೂ ನಡೆದಿದೆ.