ಮೊಬೈಲ್ ಬ್ಯಾಂಕಿಂಗ್ ಅಪ್ಲಿಕೇಶನ್‌ಗೆ SOVA ಹೆಸರಿನ ಟ್ರೊಜನ್ ವೈರಸ್ ಲಗ್ಗೆ: ಸರ್ಕಾರದ ಎಚ್ಚರಿಕೆ

ನವದೆಹಲಿ: SOVA ಹೆಸರಿನ ಟ್ರೊಜನ್ ವೈರಸ್ ಒಂದು ದೇಶದಲ್ಲಿ ಆ್ಯಂಡ್ರಾಯ್ಡ್ ಸ್ಮಾರ್ಟ್‌ಫೋನ್‌ಗಳ ಮೊಬೈಲ್ ಬ್ಯಾಂಕಿಂಗ್ ಅಪ್ಲಿಕೇಶನ್‌ಗಳನ್ನು ಗುರಿಯಾಗಿಸಿ ದಾಳಿ ನಡೆಸುತ್ತಿದೆ ಎಂದು ಸರ್ಕಾರದ ಭದ್ರತಾ ಸಂಸ್ಥೆ ಎಚ್ಚರಿಸಿದೆ. ಬಳಕೆದಾರರ ಮೊಬೈಲ್ ಪ್ರವೇಶಿಸುವ ಸೊವಾ ವೈರಸ್, ಆ್ಯಂಡ್ರಾಯ್ಡ್ ಅಪ್ಲಿಕೇಶನ್ ಜತೆಯಲ್ಲೇ ಅಡಗಿಕೊಳ್ಳುತ್ತದೆ. ಅಲ್ಲದೆ, ಇತರ ಪಾವತಿ, ಬ್ಯಾಂಕಿಂಗ್ ಮತ್ತು ಇ ಕಾಮರ್ಸ್ ಅಪ್ಲಿಕೇಶನ್‌ಗಳ ರೂಪದಲ್ಲಿ ಕಾಣಿಸಿಕೊಳ್ಳಬಹುದು. ಬಳಕೆದಾರರು ಅವುಗಳನ್ನು ಬಳಸಿದಾಗ, ಅವರ ವೈಯಕ್ತಿಕ ವಿವರ, ಬ್ಯಾಂಕಿಂಗ್ ಮತ್ತು ಹಣಕಾಸು ಮಾಹಿತಿಯನ್ನು ಕದಿಯುವ ಸಾಮರ್ಥ್ಯ ಹೊಂದಿದೆ ಎಂದು ರಾಷ್ಟ್ರೀಯ ಕಂಪ್ಯೂಟರ್ ಭದ್ರತಾ ಮತ್ತು ತುರ್ತು ಪ್ರತಿಕ್ರಿಯೆ ತಂಡ ಎಚ್ಚರಿಸಿದೆ. ಕಳೆದ ಜುಲೈ ತಿಂಗಳಿನಲ್ಲಿಯೇ ವೈರಸ್ ಪತ್ತೆಯಾಗಿತ್ತು. ನಂತರದಲ್ಲಿ ವೈರಸ್ ಮತ್ತಷ್ಟು ಅಪ್‌ಗ್ರೇಡ್ ಆಗಿದ್ದು ಐದನೇ ಆವೃತ್ತಿ ಮೊಬೈಲ್ ಬ್ಯಾಂಕಿಂಗ್ ಅಪ್ಲಿಕೇಶನ್ ಬಳಕೆದಾರರನ್ನು ಗುರಿಯಾಗಿಸಿ ದಾಳಿ ನಡೆಸುತ್ತಿದೆ. ಪಾಸ್‌ವರ್ಡ್, ಲಾಗಿನ್ ವಿವರ ಕದಿಯುವ ಸೊವಾ ವೈರಸ್, ಆರಂಭದಲ್ಲಿ ಅಮೆರಿಕ, ರಷ್ಯಾ ಮತ್ತು ಸ್ಪೇನ್‌ನಲ್ಲಿ ಪತ್ತೆಯಾಗಿತ್ತು. ನಂತರ ಭಾರತೀಯ ಬಳಕೆದಾರರನ್ನು ಗುರಿಯಾಗಿಸಿ ದಾಳಿ ನಡೆಸುತ್ತಿದೆ. ಗೂಗಲ್ ಕ್ರೋಮ್, ಅಮೆಜಾನ್ ಮತ್ತು ಎನ್‌ಎಫ್‌ಟಿ ರೂಪದಲ್ಲಿ ಸ್ಮಾರ್ಟ್‌ಫೋನ್‌ ಒಳಗೆ ಇನ್‌ಸ್ಟಾಲ್ ಆಗಿ, ನಂತರದಲ್ಲಿ ಅವರಿಗೆ ಅರಿವಿಲ್ಲದಂತೆಯೇ ಮಾಹಿತಿ ಕದಿಯುತ್ತಿದೆ ಎಂದು ಸರ್ಟ್–ಇನ್ ಹೇಳಿದೆ. ಹೀಗಾಗಿ ಬಳಕೆದಾರರು ಅಧಿಕೃತ ಆ್ಯಪ್ ಸ್ಟೋರ್‌ನಿಂದ ಡೌನ್‌ಲೋಡ್ ಮಾಡಿಕೊಂಡ ಅಪ್ಲಿಕೇಶನ್‌ಗಳನ್ನು ಮಾತ್ರ ಬಳಸುವುದು ಸೂಕ್ತ. ಜತೆಗೆ ಆ್ಯಂಟಿವೈರಸ್ ಬಳಕೆ ಮಾಡಬೇಕು ಹಾಗೂ ಆ್ಯಪ್ ಮತ್ತು ಓಎಸ್ ಅಪ್‌ಡೇಟ್‌ಗಳನ್ನು ಕಾಲಕಾಲಕ್ಕೆ ಮಾಡಬೇಕು ಎಂದು ಸರ್ಟ್–ಇನ್ ಎಚ್ಚರಿಸಿದೆ.