ತುಳು ಚಿತ್ರದಲ್ಲಿ ಇದೇ ಮೊದಲ ಬಾರಿಗೆ ಅಭಿನಯಿಸುತ್ತಿದ್ದೇನೆ, ಪೂರ್ಣ ಪ್ರಮಾಣದಲ್ಲಿ ತುಳು ಕಾಮಿಡಿ ಚಿತ್ರ ಮಾಡುವ ಆಸೆ ಇದೆ: ಸುನಿಲ್‌ ಶೆಟ್ಟಿ

ಮಂಗಳೂರು: ಮಲಯಾಳಂ, ಬೆಂಗಾಳಿ, ಮರಾಠಿ ಸಿನೆಮಾಗಳು ಪ್ರಾದೇಶಿಕವಾಗಿಯೇ ಮೂಡಿ ಜಾಗತಿಕವಾಗಿ ಬಹಳಷ್ಟು ಸಾಧನೆ ಮಾಡಿವೆ. ಇದು ಬಜೆಟ್‌ ಮೂಲಕ ಗುರುತಿಸಿದ ಸಿನೆಮಾ ಅಲ್ಲ; ವಿಷಯ ಆಧಾರಿತವಾಗಿ ಮೂಡಿದ ಸಿನೆಮಾ. ತುಳು ಭಾಷೆ ಸಿನೆಮಾಕ್ಕೂ ಇಂತಹ ಅವಕಾಶ ಬಹಳಿಷ್ಟಿದೆ. ತುಳು ಭಾಷೆ ಕೂಡ ಜಾಗತಿಕವಾಗಿ ಬೆಳೆಯಲು ಎಲ್ಲ ಸಾಧ್ಯತೆ ಇದೆ ಎಂದು ಬಾಲಿವುಡ್‌ ನಟ ಸುನೀಲ್‌ ಶೆಟ್ಟಿ ಹೇಳಿದರು.

ರೂಪೇಶ್‌ ಶೆಟ್ಟಿ ಅಭಿನಯದ ತುಳುವಿನ ಬಹುನಿರೀಕ್ಷೆಯ ಜೈ ಸಿನೆಮಾದ ಶೂಟಿಂಗ್‌ ಹಿನ್ನೆಲೆಯಲ್ಲಿ ಗುರುವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ತುಳುವರು ಬಾಲಿವುಡ್‌ ಸಹಿತ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ್ದಾರೆ. ತುಳುನಾಡಿನ ಸಂಸ್ಕೃತಿ, ಜಾಗ ಅದ್ಭುತ. ಬೇರೆ ಸಿನೆಮಾದವರಿಗೂ ಚಿತ್ರೀಕರಣಕ್ಕೆ ಉತ್ತಮ ಅವಕಾಶವಿದೆ. ತುಳು ಚಿತ್ರದಲ್ಲಿ ಇದೇ ಮೊದಲ ಬಾರಿಗೆ ಅಭಿನಯಿಸುತ್ತಿದ್ದೇನೆ. ಹಿಂದೆ ಸಾಕಷ್ಟು ಅವಕಾಶ ಸಿಕ್ಕಿತ್ತಾದರೂ ನಟಿಸಲು ಸಾಧ್ಯವಾಗಿರಲಿಲ್ಲ. ಪೂರ್ಣ ಪ್ರಮಾಣದಲ್ಲಿ ತುಳು ಕಾಮಿಡಿ ಚಿತ್ರ ಮಾಡುವ ಆಸೆ ಇದೆ. ಕಾಮಿಡಿ ಎನ್ನುವುದು ಯೂನಿವರ್ಸಲ್‌ ಭಾಷೆ, ಹಾಗಾಗಿ ಕಾಮಿಡಿ ನನ್ನ ನಿರೀಕ್ಷೆ ಎಂದರು.