ಮಂಗಳೂರು: ಹೆಸರು, ವಿಳಾಸ ಬದಲಿಸಿ 15 ವರ್ಷಗಳಿಂದ ತಲೆಮರೆಸಿಕೊಂಡಿದ್ದ ಮಹಿಳೆ ಸೆರೆ

ಮಂಗಳೂರು: PITA ಅಡಿ ದಾಖಲಾಗಿದ್ದ ಪ್ರಕರಣದಲ್ಲಿ ಹೆಸರು ಮತ್ತು ವಿಳಾಸ ಬದಲಿಸಿಕೊಂಡು ಸುಮಾರು 15 ವರ್ಷಗಳಿಂದ ನ್ಯಾಯಾಲಯಕ್ಕೆ ಹಾಜರಾಗದೇ ತಲೆಮರೆಸಿಕೊಂಡಿದ್ದ ಎಲ್‌ಪಿಸಿ ವಾರಂಟ್​ ಆರೋಪಿತೆಯನ್ನು ಮಂಗಳೂರು ನಗರ ಮಹಿಳಾ ಪೊಲೀಸ್ ಠಾಣಾ ಅಧಿಕಾರಿ ಹಾಗೂ ಸಿಬ್ಬಂದಿ ಪತ್ತೆಹಚ್ಚಿ ಬಂಧಿಸಿದ್ದಾರೆ ಎಂದು ಮಂಗಳೂರು ನಗರ ಪೊಲೀಸ್ ಪ್ರಕಟಣೆ ತಿಳಿಸಿದೆ. ಬಂಧಿತ ಆರೋಪಿತೆಯನ್ನು ಮೂಡಬಿದರೆ ತಾಲೂಕಿನ ಪುತ್ತಿಗೆ ಗ್ರಾಮ, ಬಡಗಮಿಜಾರು, ಹಂಡೇಲ ಮಸೀದಿ ಬಳಿಯ ನಿವಾಸಿ ಸಫಿಯಾ (53) ಎಂದು ಗುರುತಿಸಲಾಗಿದೆ.

ಸುಳ್ಳು ಹೆಸರು ನೀಡಿ ತಲೆಮರೆಸಿಕೊಂಡಿದ್ದ ಆರೋಪಿತೆ: ಆರೋಪಿತೆಯ ವಿರುದ್ಧ ಮಂಗಳೂರು ನಗರ ಮಹಿಳಾ ಪೊಲೀಸ್ ಠಾಣೆಯಲ್ಲಿ ಅ.ಕ್ರ: 09/2011 ಕಲಂ: 3(2)(a), 5(1)(a), 7 ಪಿ.ಐ.ಟಿ.ಪಿ ಕಾಯ್ದೆ (Prevention of Immoral Trafficking Act) ಅಡಿ ಪ್ರಕರಣ ದಾಖಲಾಗಿತ್ತು. ಸದರಿ ಪ್ರಕರಣವು ಮಂಗಳೂರಿನ 3ನೇ ಜೆ.ಎಂ.ಎಫ್.ಸಿ ನ್ಯಾಯಾಲಯದಲ್ಲಿ ವಿಚಾರಣೆಯಾಗಿ, LPC ನಂ: 10/2019 ರಂತೆ ದೀರ್ಘಕಾಲದಿಂದ ಬಾಕಿ ಉಳಿದಿತ್ತು.

ಪ್ರಕರಣ ದಾಖಲಾಗಿ ದಸ್ತಗಿರಿಯಾದ ಸಂದರ್ಭದಲ್ಲಿ ಆರೋಪಿತೆಯು ತನ್ನ ಹೆಸರು ಮತ್ತು ಗಂಡನ ಹೆಸರು-ವಿಳಾಸವನ್ನು ಮರೆಮಾಚಿ “ಆಯಿಷಾ (36), ಗಂಡ: ಹಸನಬ್ಬ, ಬಂಗಗುಡ್ಡೆ ಮನೆ, ಗುರುಪುರ, ಮಂಗಳೂರು” ಎಂಬುದಾಗಿ ಸುಳ್ಳು ಮಾಹಿತಿ ನೀಡಿದ್ದಳು. ನ್ಯಾಯಾಲಯವು ಆಕೆಯ ಹಾಜರಾತಿಗಾಗಿ ಹಲವಾರು ಬಾರಿ ಎಲ್‌ಪಿಸಿ ವಾರಂಟ್​ ಹೊರಡಿಸಿದ್ದರೂ, ಆಕೆ ಹಾಜರಾಗದೇ ಸಫಿಯಾ ಮೂಡಬಿದರೆಯ ಬಡಗಮಿಜಾರಿನಲ್ಲಿ ವಿಳಾಸ ಬದಲಿಸಿಕೊಂಡು 15 ವರ್ಷಗಳಿಂದ ಪೊಲೀಸರು ಹಾಗೂ ನ್ಯಾಯಾಲಯಕ್ಕೆ ಸಿಗದೆ ತಲೆಮರೆಸಿಕೊಂಡಿದ್ದಳು ಎಂದು ಮಂಗಳೂರು ನಗರ ಪೊಲೀಸ್ ಪ್ರಕಟಣೆ ತಿಳಿಸಿದೆ.

ಬೆರಳು ಮುದ್ರೆ ತಜ್ಞರ ವರದಿಯಿಂದ ಸಿಕ್ಕಿಬಿದ್ದ ಆರೋಪಿ: ಆರೋಪಿತೆಯ ಗುರುತು ಪತ್ತೆಗಾಗಿ ಆಕೆಯ ಬೆರಳಚ್ಚನ್ನು ಮಂಗಳೂರಿನ ಬೆರಳು ಮುದ್ರೆ ಘಟಕದ ತಜ್ಞರಿಗೆ ಪರಿಶೀಲನೆಗೆ ಕಳುಹಿಸಲಾಗಿತ್ತು. ಮಹಿಳಾ ಪೊಲೀಸ್ ಠಾಣೆಯ ಅ.ಕ್ರ: 09/2011 ಪ್ರಕರಣದ ಕಡತದಲ್ಲಿದ್ದ ಹಳೆಯ ಬೆರಳಚ್ಚಿಗೆ ಈಗಿನ ಬೆರಳಚ್ಚು ಸಂಪೂರ್ಣವಾಗಿ ಹೋಲಿಕೆಯಾಗಿರುವುದು ತಜ್ಞರ ವರದಿಯಿಂದ ದೃಢಪಟ್ಟಿತ್ತು.

ಇದರ ಬೆನ್ನಲ್ಲೇ ದಿನಾಂಕ 18-08-2026 ರಂದು ಮಂಗಳೂರು ನಗರ ಮಹಿಳಾ ಪೊಲೀಸ್ ಠಾಣಾ ಅಧಿಕಾರಿ ಹಾಗೂ ಸಿಬ್ಬಂದಿ ಕಾರ್ಯಾಚರಣೆ ನಡೆಸಿ ಆರೋಪಿತೆ ಸಫಿಯಾಳನ್ನು ಬಂಧಿಸಿ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದು, ನ್ಯಾಯಾಲಯವು ಆಕೆಗೆ ನ್ಯಾಯಾಂಗ ಬಂಧನ ವಿಧಿಸಿದೆ ಎಂದು ಮಂಗಳೂರು ನಗರ ಪೊಲೀಸ್ ಪ್ರಕಟಣೆ ತಿಳಿಸಿದೆ.