ಹನಿ-ಟ್ರ್ಯಾಪ್ ದಂಧೆ ನಾಲ್ಕು ವರ್ಷಗಳಲ್ಲಿ 30 ಕೋಟಿ ರೂ. ಮಿಕ್ಕಿದ ಆಸ್ತಿ ಸಂಪಾದಿಸಿದ ಬಂಟಿ-ಬಾಬ್ಲಿ ದಂಪತಿ ಬಂಧನ

ಭುವನೇಶ್ವರ್, ಅ.15: ಅತ್ಯಂತ ಬಡ ಕುಟುಂಬದಲ್ಲಿ ಜನಿಸಿದ 26 ವರ್ಷದ ಯುವತಿಯೊಬ್ಬಳು ಹನಿಟ್ರ್ಯಾಪ್ ದಂಧೆಯನ್ನೇ ಕಸುಬಾಗಿಸ್ಕೊಂಡು ರಾಜಕಾರಣಿಗಳು, ಉದ್ಯಮಿಗಳು, ಚಿತ್ರ ನಿರ್ಮಾಪಕರನ್ನು ಬಲೆಗೆ ಕೆಡವಿ ಕೇವಲ ನಾಲ್ಕು ವರ್ಷಗಳಲ್ಲಿ 30 ಕೋಟಿ ರೂ. ಮಿಕ್ಕಿದ ಆಸ್ತಿ ಸಂಪಾದಿಸಿದ ಪ್ರಕರಣ ಒಡಿಶಾದಲ್ಲಿ ಬೆಳಕಿಗೆ ಬಂದಿದೆ.‌ ಪೊಲೀಸ್ ದಾಖಲೆಗಳಲ್ಲಿ 26 ವರ್ಷದ ಮಹಿಳೆ ಅರ್ಚನಾ ಬ್ಲ್ಯಾಕ್‌ಮೇಲ್​ ಮಾಡಿ ಹಣ ಸಂಪಾದಿಸುತ್ತಿದ್ದಳು ಎನ್ನಲಾಗಿದೆ. ವೈಯಕ್ತಿಕ ಫೋಟೋಗಳು ಮತ್ತು ವಿಡಿಯೋಗಳನ್ನು ಸಾರ್ವಜನಿಕವಾಗಿ ಮಾಡುವುದಾಗಿ ಬೆದರಿಕೆ ಹಾಕುತ್ತಿದ್ದ ಅರ್ಚನಾ ಈ ಮೂಲಕ ರಾಜಕಾರಣಿಗಳು, ಉದ್ಯಮಿಗಳು ಮತ್ತು ಚಲನಚಿತ್ರ ನಿರ್ಮಾಪಕರಂತಹ ಶ್ರೀಮಂತ ಮತ್ತು ಪ್ರಭಾವಿ ವ್ಯಕ್ತಿಗಳಿಂದ ಹಣವನ್ನು ಸುಲಿಗೆ ಮಾಡಿದ್ದಾಳೆ ಎಂಬ ಆರೋಪ ಕೇಳಿ ಬಂದಿದೆ.

ಬಂಗಲೆ, ಕಾರು, ಐಷಾರಾಮಿ ಜೀವನ ! : ಹನಿಟ್ರ್ಯಾಪ್‌ನಿಂದ ಗಳಿಸಿದ ಕೋಟ್ಯಂತರ ಹಣದಿಂದಲೇ ಭವ್ಯ ಬಂಗಲೆ, ವಿದೇಶಿ ಅಲಂಕಾರಿಕ ವಸ್ತುಗಳು, ಐಷಾರಾಮಿ ಕಾರುಗಳನ್ನು ಖರೀದಿಸಿದ್ದಾಳೆ. ಇದಲ್ಲದೆ, 4 ದುಬಾರಿ ನಾಯಿಗಳು ಹಾಗೂ ಒಂದು ಕುದುರೆಯನ್ನೂ ಆಕೆ ಹೊಂದಿದ್ದಾಳೆ. ಇಷ್ಟೆಲ್ಲಾ ಅಕ್ರಮ ಎಸಗಿದ್ದರೂ ಆಕೆಯನ್ನು ಅಲ್ಲಾಡಿಸುವುದಕ್ಕೂ ಆಗಿಲ್ಲ. ಅತಿ ಸಣ್ಣ ಪ್ರಾಯದಲ್ಲಿ ಈಕೆ ಇಷ್ಟೊಂದು ಆಸ್ತಿ ಸಂಪಾದಿಸಿದ್ದು ಪೊಲೀಸರನ್ನೇ ಹುಬ್ಬೇರಿಸಿದೆ. ಇತ್ತೀಚೆಗೆ ದಾಖಲಾದ ಎರಡು ಪ್ರತ್ಯೇಕ ದೂರುಗಳನ್ನು ಆಧರಿಸಿ ಅರ್ಚನಾಳನ್ನು ಪೊಲೀಸರು ಬಂಧಿಸಿದ್ದಾರೆ.

ಕಲಹಂಡಿಯ ಲಾಂಜಿಗಢದಲ್ಲಿ ಜನಿಸಿದ ಅರ್ಚನಾ ಅದೇ ಜಿಲ್ಲೆಯ ಕೆಸಿಂಗಾದಲ್ಲಿ ಬೆಳೆದರು. ಆಕೆಯ ತಾಯಿ 2015 ರಲ್ಲಿ ಭುವನೇಶ್ವರಕ್ಕೆ ಬರುವ ಮೊದಲು ಅಲ್ಲಿ ಕೆಲಸ ಮಾಡುತ್ತಿದ್ದರು. ಅದೇ ಸಮಯದಲ್ಲಿ ಅರ್ಚನಾ ಅವರ ಪತಿ ಜಗಬಂಧು ಸೆಕೆಂಡ್ ಹ್ಯಾಂಡ್ ಕಾರುಗಳ ಶೋ ರೂಂ ನಡೆಸುತ್ತಿದ್ದರು. ಜಗಬಂಧು ಅನೇಕ ರಾಜಕಾರಣಿಗಳು, ಬಿಲ್ಡರ್‌ಗಳು, ಉದ್ಯಮಿಗಳು ಮತ್ತು ಹಣವಂತರ ಸಂಪರ್ಕ ಹೊಂದಿದ್ದರು. ಜಗಬಂಧು ಮತ್ತು ಅರ್ಚನಾ ಅವರು ಕೆಲವು ಶಾಸಕರು ಸೇರಿದಂತೆ ಪ್ರಭಾವಿ ವ್ಯಕ್ತಿಗಳೊಂದಿಗೆ ಇರುವ ಚಿತ್ರಗಳು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದ್ದು, ರಾಜ್ಯಾದ್ಯಂತ ಕೋಲಾಹಲಕ್ಕೆ ಕಾರಣವಾಗಿವೆ. ಅರ್ಚನಾ ಅನೇಕ ಶ್ರೀಮಂತ ಮತ್ತು ಪ್ರಭಾವಿ ವ್ಯಕ್ತಿಗಳೊಂದಿಗೆ ಸ್ನೇಹ ಬೆಳೆಸಿದ್ದಳು. ಈ ನಡುವೆ ಅನೇಕ ಪ್ರಭಾವಿಗಳಿಗೆ ಹೆಣ್ಮಕ್ಕಳನ್ನು ಸಾಗಿಸುತ್ತಿದ್ದ ಆರೋಪವೂ ಆಕೆ ಮೇಲಿದೆ. ಬಳಿಕ ಈ ಪ್ರಭಾವೀ ವ್ಯಕ್ತಿಗಳ ವೈಯಕ್ತಿಕ ಛಾಯಾಚಿತ್ರಗಳನ್ನು ತೆಗೆದು ನಂತರ ಹಣಕ್ಕಾಗಿ ಬ್ಲಾಕ್ ಮೇಲ್ ಮಾಡುತ್ತಿದ್ದ ಎಂದು ಪೊಲೀಸರು ಹೇಳಿದ್ದಾರೆ. ಇತ್ತೀಚೆಗೆ ಒಡಿಶಾ ಚಿತ್ರರಂಗದ ಚಿತ್ರ ನಿರ್ಮಾಪಕರೊಬ್ಬರು ತನ್ನನ್ನು ಯುವತಿಯರ ಜೊತೆಗಿದ್ದ ಫೋಟೋ ತೋರಿಸಿ 3 ಕೋಟಿ ರೂ. ಹಣಕ್ಕೆ ಬೇಡಿಕೆ ಇಟ್ಟಿದ್ದಾಳೆ ಎಂದು ಅರ್ಚನಾ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದರು. ಇನ್ನೊಬ್ಬ ಯುವತಿಯೂ ತನ್ನನ್ನು ಸೆಕ್ಸ್ ದಂಧೆಗೆ ಬಳಸಿಕೊಂಡಿದ್ದಾಗಿ ದೂರು ಹೇಳಿಕೊಂಡಿದ್ದಳು. ಪ್ರಕರಣ ದಾಖಲಿಸಿದ ಪೊಲೀಸರು ಅರ್ಚನಾಳನ್ನು ಬಂಧಿಸಿದ್ದಾರೆ.